【MenClub Gadgets】精細！Logitech MX Anywhere 3無線滑鼠

香港第四波疫情話黎就黎，每日接近100單確診再次令港人個個人心惶惶...因此相信唔少公司將好大機會再次WFH(無打錯字架)。而有WFH經驗嘅朋友，相信唔少人喺屋企都有各自嘅問題，但其中點都離唔開空間有限呢個香港先天問題，所以希望下面嘅介紹可以幫到你。

WFH嘅你，絕大部份點都離唔開用電腦工作，就算你有Notebook/Macbook好似好慳位，但講真如果你係要成日用Mouse Pad嘅人，手指長時間咁做野都真係會攰，甚至勞損。所以，有陣時真係唔慳得，一隻Mouse真係令你做野舒服得多。

不過Mouse都有好多種，而要喺空間不多嘅台面工作，無線Mouse絕對係更好嘅選擇，佢幫你釋放台面嘅空間，同時唔怕會有條長長嘅線「吊吊揈」。而如果係For女性嘅話，由於手掌較小，一個精細嘅Mouse會更好，如果唔係拎住佢成日都未必咁就手。

近日Logitech推出嘅呢款MX Anywhere 3無線Mouse，除左有「娜姐」周秀娜加成之外，其功能亦當然係出色。佢唔單止幾乎喺任何材質表面上使用(仲用Mouse pad咩唔通...)，講嘅係包括木材、金屬、甚至係玻璃都可以，基本上真係anywhere都可以使用。而其MagSpeed滾輪，更可以喺1秒左右上下捲動1000行，真係唔使再慢慢碌上碌落浪費時間。

另外，MX Anywhere 3係用Type-C充電的，一次充爆電嘅話可以用足70日，可以循環叉電唔使買電芯，非常環保。今個聖誕送禮物比女朋友又多一個選擇啦，送一隻比佢然後同佢講:「WFH快樂!」啦！